Manipur : Imphal East-ah CrPC Section 144 puang

Manipur-a Imphal East district-a Telipati hmunah Thawhṭanni zan khan temple sakna ram chungchangah buaina a chhuak a, motor eng emaw zat halin bungruate tihchhiat a ni. He thil thleng vang hian Thawhlehni aṭang khan mi panga aia tam punkhawm khapna, CrPC Section 144 puan nghal a ni bawk.

Telipati hmuna buaina siamtu mi 100 vel niin, zan dar 10.30 velah bus-in an pawikhawihna hmun hi an pan a ni. Pawikhawihna thlen hnu hian CRPF company pakhat leh state police 50 chuang tirh an ni a, pungkhawmnte chu tear gas hmangin an hnawt kiang a ni.

Chief minister N Biren Singh chuan Thawhlehni khan pawikhawina thlenna hmun hi tlawhin, pawikhawihtute chu hremna pek an nih ngei tur thu a sawi. Hemi rual hian mipuite chu buaina tipunlun zawnga hma la lo tur te, kawngpui danga bandh huaihawt lo tura ngenin, sorkar chuan hma a la dawn a ni, a ti.

Tualchhung mite chuan Thawhṭanni chhun lamah khan mi eng emaw zat chuan temple sakna tur hmun nia an sawi chu an thianfai a, mahse thuneitute lam aṭangin hemi chungchangah hriatttirna engmah an dawn loh vangin kalsawn turin an ngen a, an ni pawh an kal sawn ve mai niin an sawi. Mahse zan lamah mi ṭhahnem tak chu bus nena thawk chhuak ṭha lehin, temple sakna tur bul vela motor leh chenna in ṭhenkhat an rawn bei zui a ni. Motor hi four wheeler 15 leh two-wheeler 2 an suasam a, motor paruk an hal bawk. Hei bakah hian chenna in ṭhenkhat pawh beiin an bungrua an tihchhiatsak bawk a ni.