Sorkar laipuiin hmarchhak khualzin hip nan tilar dawn

Sorkar laipuiin khualzin mite hip turin hmarchhak state te chu chawilar a tum tih Ministry of Tourism Secretary, Rashmi Verma chuan a sawi.

International Tourism Mart (IMT) vawi rukna neihnaah he thu hi sawiin Verma chuan, IMT hmarchhaka buatsaih a nih chhan bulpui ber pawh hmarchhak state ten khualzin mite hip turin theihna an neih zia lantir nan a nih thu leh inter-regional contract chawi lar nan a nih thu a sawi bawk.

Verma chuan hmarchhaka khualzin mite hip an nih theih nan electronic media campaign pawh kalpui mek a nih thu a sawi. He thil kaihhnawihah hian Japan leh Russia-ah te pawh roadshow buatsaih tum a nih thu sawiin a senso zawng zawng pawh Tourism Department in an tum vek dawn a ni, a ti.

ITM vawi ruk an neihna danglam bikna sawiin Tourism Secretary chuan, ṭum dang zawng aia ramdang mi palai an ngah thu a sawi. Ram hrang hrang 29 aṭangin palai 70 chuang an tel thu leh ramchhung hmun hrang hrang aṭangin tour operator 30 vel an tel thu a sawi bawk a ni. Hmarchhak state hrang hrang aṭangin tour operator 103 vel lai an tel thu a sawi a, hmarchhak chu khualzin miten nasa thei ang bera an tlawh theih nana chawi lar an tum thu a sawi bawk.

ITM-ah hian hmarchhak state te awlsam zawka thlawh­theihna hmanga kalpawh theih dan tur pawh sawiho a ni a, khualzin mite hip theihna tura ruahmanna hrang hrang an siam pawh an en ho a ni.

An ruahmanna siam dan ṭhenkhat pawh tarlangin Verma chuan, hmarchhaka chengte nihna leh nihphung ti dal si loa khualzin mite hip dan tur ngaihtuah a nih thu a sawi bawk.

Assam Tourism Minister Himanta Biswa Sarma chuan Guwahati-a ITM vawi rukna nghah a nih avangin sorkar laipui hnenah lawmthu a sawi. Assam-a resort ti changtlung turin Club Mahindra leh Assam sorkar in MoU an ziah vat tur thu a sawi bawk a ni.