Journalist thah vangin PCI hotu Tripura-ah zin
Press Council of India (PCI) Chairman Justice Chandramauli Kumar Prasad chuan Thawhlehni zan khan Agartala a thleng a, Tripura-a journalist thah an nih vanga zin a nih thu Nilainia official thuchhuah chuan a tarlang.
Justice Prasad hi Tripura-ah hian ni thum cham turin a zin a, Nilaini khan journalist an thah tak chhungte hi tlawhin inkawmna hun an hmang.
PCI Chairman chuan media body hrang hrang kawmna hun a hmang nghal a, Agartala Press Club leh media person dang te a kawm a ni. Chief Minister Manik Sarkar pawh hmuin Chief Secretary Sanjeev Ranjan, Director General of Police Akhil Kumar Shukla leh senior police official dang te hmu turin ruahmanna a siam bawk a ni.
November 21 khan reporter Sudip Dutta Bhowmik (50) chu Agartala bul lawka Tripura State Rifle (TSR) camp-ah kahhlum a ni a, TV Journalist Santanu Bhowmick (28) pawh September 20 khan thah a lo ni tawh bawk.
Tualthahna chhuizui tur hian Tripura sorkar chuan Special Investigation Team (SIT) pahnih Deputy Inspector General of Police Arindam Nath leh Inspector General of Police (IGP) G.S. Rao te kaihhruaina hnuaiah a din tawh a ni.
SIT Nath a kaihhruai te hian Dutta Bhowmik thah chung changah hian a kaphlumtu leh TSR Commander an man tawh a, Santanu Bhowmick case-ah erawh SIT Rao kaihhruaiten mi pali an man tawh thung.