Naga Framework Agreement : Rajnath Singh-a'n Assam, AP leh Manipur CM kawm dawn

Union Home Minister Rajnath Singh chuan sorkar laipui leh Nagaland Socialist Council of Nagaland- Isak- Muivah (NSCN-IM)-te'n kum 2015-a Framework Agreement (FA) an ziah chungchangah Assam, Arunachal Pradesh leh Manipur Chief Minister-te a kawm dawn.

Naga Framework Agreement hi tun thlengin puanzar a la ni lo a, hemi vang hian Nagaland ṭhenawm state-a pawl hrang hrangte chuan lugawi lohna an lo lantir fo tawh a ni. Ningani lawk pawh khan Manipur-a Imphal district huamchhungah pawl pakhat, Thangmeiband United Club-te chuan kawng an dang chat a, FA-a thu inziakte tarlan ngiatin sit-in protest an huaihawt a ni.

FA chungchangah hian Manipur CM N Biren Singh pawhin Assam CM Sarbananda Sonowal leh Arunachal CM Pema Khandu-te kawm a tum a, Rajnath Singh lokal hma ngeia inbiakna neihpui hman a tum thu tarlan a ni. Heng state pathum Assam, Arunachal leh Manipur-ahte hian FA vang hian dodalna a tam hle a, an state area ṭhenkhat hloh thei dinhmunah an dinga a lan avangin FA hi tlangzarh turin an nawr nasa hle a ni. Sarbanada Sonowal pawhin Assam-in FA avanga a ram chin inchi khat pawh a hloh dawn loh tur thu a lo sawi tawh bawk.

Manipur Chief Minister pawh lo ni tawh Radhabinod Koijam pawhin Ningani khan thuchhuah siamin politics vanga inhmuhthiam loh a hun tawh loh thu a sawi a, pawl leh pawl inkara inbei mai loin stakeholder zawng zawng an inrawlh a hun tawh a ni, a ti. FA-a thu inziak te tlangzarh a nih loh avang hian eptu pawl Congress chuan vawi tam tak do dalna a lo lantir tawh bawk a ni.

Nagaland buaina kum tam tak chhung awm tawh chinfel a nih theih nan hian NSCN-IM leh sorkar laipui chuan August 3, 2015 khan Framework Agreement an ziak a, he inremna ziahnaah hian Prime Minister Narendra Modi pawh a awm a ni. Mi ṭhenkhat chuan he inremna hi kalpui a nih chuan Nagaland ṭhenawm state pathumte hian an ram chin an hloh ṭhen dawn niin an sawi.

Rajnath Singh-a'n state pathum CM-te hmuh a tum takah hian inremna an ziah chungchang hian nasa leh zual zawkin ngaihven a hlawh a, mi tam takin FA-a thu inziak hi hriat an chak hle a ni.

President Ram Nath Kovind pawhin December 1-a Hornbill Festival hawnna a neih ṭuma a thu sawiah, Framework Agreement chungchangah thutlukna tawp an siam ṭep niin a lo sawi tawh bawk a ni.