Tripura-ah Indo-Bangla friendship Park hawng dawn

India leh Bangladesh inṭhian ṭhatnain hma a sawn zelna turin Tripura sorkar chuan South Tripura District-a Chottakhola-ah December 16 hian Indo - Bangla Friendship park an hawng dawn tih tarlan a ni.

Chottakhola hi Tripura khawpui Agartala aṭanga km 130 vela hlaa awm a ni a, park an hawn turah hian India Prime Minister hlui Indira Gandhi lim leh Bangladesh founding father Sheikh Mujibar Rahman lim siam a nih thu official-te chuan an sawi a, park zauh zawng hi hectare 20 a nih thu an sawi bawk.

He park-ah hian BSF leh Sipaite chanchin inziahna pawh dah a ni dawn a, ram pahnih ten inlaichinna ṭha an neih zel theih nan he park hi din a ni.

Nilaini tlaia Revenue Minister Badal Choudhury-a'n Civil Secretariat a thu a sawi naah Union Ministry of Tourism siam Swadesh Darshan scheme hnuaiah state sorkarin khualzinte hipna tur atan ruahmanna a thehluh zinga mi a nih thu a sawi bawk.

Choudhury chuan 1971 Liberation War-ah Tripura chuan fawng pawimawh tak an chelh thu a sawi a, raltlan nuai 16 aia tam mah chenna an buatsaih sak thu a sawi. He indonaah hian sipai tam tak an thih thu sawiin, thite hriatreng nan leh ram pahnih inkara boruak ṭha a awm theih nan sorkar chuan park hi a hawng dawn a ni, a ti.

Friendship park hi Tripura Chief Minister Manik Sarkar-a'n a hawng dawn a ni.