Hmarchhak biala ram hectare nuai 2-a zauah rubber chin belh tum

Rubber Board chairman Sawar Dhanania chuan India ramin natural rubber (NR) a mamawhte phuhrukna turin 'NE-MITRA' project hnuaiah hmarchhak state hrang hranga rubber chinna hmun, hectare nuai 2 vela nausah siam tum a ni tih a sawi. Hemi atan hian Rs vbc 1,000 chuang invest a ni dawn tih a sawi bawk.

Tripura state tlawha zin, Dhanania chuan India-in kumkhata NR a mamawh chu metric ton nuai 12.50 a nih laiin, a thar chhhuah hi TM nuai 7 vel a ni a, hei vang hian a mamawh ang zat hi ram chhunga tharchhuah a nih theihna atan rubber chinna hmun hi siam belh zel tum a ni, a ti.

Hmarchhak biala rubber plantation siamna atan hian kum nga chhung tyre siamtu company pali chuan Rs vbc 1,100 an invest dawn a, hma lak ṭan nghal a nih thu Dhanania chuan a sawi. Rubber Board chuan hmarchhak bial leh West Bengal-a ram zau tak chu rubber chinna tur atan hian a lo enfiah tawh a ni.

Dhanania chuan rubber chin hian leilung pawh a tichhe lo tih sawiin, rubber kungte chuan carbon dioxide an hiplut hnemin, oxygen pawh an pechhuak ṭha hle tih a sawi. "Kum 30 hnu lamah chuan rubber kung hmang hian furniture ṭha leh tlo zawkte siamchhuah a ni tawh dawn a ni," a ti.

Rubber Board official chuan India ramah 2021-22 chhungin ram hectare 8,26,660-a zauah rubber hi chin niin heng zinga hectare 5,26,500 aṭangin tharchhuah a ni a, hectare 1-ah natural rubber kg 1,472 zel ang tharchhuah a ni, a ti.

Tripura hi Kerala state dawtah India rama NR tharchhuah tamna state niin, ram hectate 89,264-a zauah rubber hi chin a ni a, kum khatah rubber ton 93,371, Rs vbc 1,691 man vel an tharchhuak ṭhin. Chhungkaw tam takin eizawnna atan an hmang tawh a ni.