Brahmaputra lui mihring tan hman tlak loh chho zel

Assam state chhunga hmun pathuma Brahmaputra lui tui chu mihring tana hman tlak loh khawpin a bawlhhlawh tih test report chuan kar kalta Inrinni khan a tarlang.

Assam in an rin ber Brahma­putra lui chuan bawlhhlawh lam a pan zel a, kar kalta chhung ringawt pawh khan a nu chak hle a, fur lai ni si loa hetianga lui tui nu leh diak hian Assam hmun ṭhenkhatah chuan harsatna a thlen chho mek a ni.

Lui kam vela cheng te chuan lui tui hi an in ngam tawh loh thu an sawi.

Dibrugarh district-a Main­janghat leh Bogibeelghat bakah Sonitpur district-a Jahajghat hmuna Brahmaputra lui tui sam­ple te chu lak niin laboratory hrang hangah test a ni. Test result-a a lan danin tui thianghlim zawng tehna Turbity level chu a chhe hle a, Bureau of Indian Standards in mihring hman atana a phal chin chu 5 NTU a nih laiin Mainjanghat, Bogibeelghat leh Jahajghat tui an test result hi chu 296 NTU, 404 NTU leh 162 NTU te an ni daih a ni. Hemi a nih vang hian tui test tute chuan mihring tana hlauhawm khawpa tui hi a bawlhhlawh tawh thu an sawi a, mihring tana in chi a nih loh thu an sawi bawk.

Assam Water Resources Minister Kesab Mahanta chuan Brahmaputra lui hi a enfiah reng a, press release in an tarlan danin Mahanta chuan Union Water Resources Minister Nitin Gadkari hnenah test result hi Central Water Commission (CWV) hneha hrilh ve turin a ti niin an tarlang.

Assam Chief Minister Office thuchhuah in a tarlan danin, Chief Minister Sarbananda Sonowal thupek angin lui tui sample te hi Indian Institute of Chemical Technology, Hyderabad leh IIT-Guwahati-ah te test tura thawn a nih thu a sawi bawk a ni.

State Health Minister Himanta Biswa Sarma chuan China chhunga lui khuahna siam a nih vang leh chhiatna eng emaw thleng vanga Brahmaputra lui hi bawlhhlawh niin a sawi.

Brahmaputra lui hi Tibet aṭanga rawn luang ṭan niin Yarlung Tsangpo tih a ni a, Arunachal-ah luang luitin Siang tia hriat a ni leh a, Assam-ah hian Brahmaputra tia hriat a ni ve thung a, Bangladesh-ah a luang lut leh a ni.

Aruanchal Pradesh pawh Siang lui bawlhhlawh vang hian a buai hle a, sorkar laipui lamah pawh hemi chungchangah hian report te pawh a lo thehlut tawh a, lui bawlhhlawh vanga China an demna thu te pawh Prime Minister hnenah an lo thlen tawh bawk a ni.