Hornbill Festival tluang takin zo

Hornbill Festival vawi 18-na chu December 10 khan tluang taka zawh a ni ta a, kumin Hornbill Festival hi an tihṭan kum aṭanga tlawhtu tam ber ṭum a la ni.

Festival khar nan hian meipui chheh lamkual in Naga Tribe hrang hrang aiawh an lamkual a, he hunah hian Miss Nagaland 2017, Marina Kiho, Chief Minister TR Zeliang leh Governor PB Acharya te pawh an tel a ni.

Khuallian Governor Acharya chuan thu sawiin, Naga Tribe hrang hrang ten an hnam thawmhnaw, hla leh lam te phochhuahna hun an nei thei chu lawmawm a tih thu a sawi. Chief Minister leh a cabinet member, C Apok Jamir, Parliamentary Secretary for Tourism leh Eshak Konyak, Parliamentary Secretary for Art & Culture leh an officer leh staff te chu Hornbill Festival hlawhtling taka an buatsaih vangin lawmthu a hrilh a, Information & Public Relation Department pawh a lawmpui thu sawiin Hornbill Festival chu khawvel puma hriat a nih tawh thu a sawi.

Festival hi mi pawimawh tam tak in an chhim a, December 1 khan President Ram Nath Kovind chuan festival hi a hawng a ni.

Chief Minister TR Zeliang pawhin Festival chu ni sarih a kaihtawi rawtna awm mah se ni 10 awh tura kaltlangpui a ni chu tifuh an intih thu a sawi. Zeliang chuan state dang Arunachal Pradesh, Manipur, Megha­laya, Mizoram, Tripura leh Madhya Pradesh aṭanga hnam thil entir tura tel te avangin lawmthu a sawi bawk.

Hornbill Festival 2017-ah hian tlawhtu chhinchhiah mi 2,43,214 an awm a, festival an buatsaih ṭan tirh aṭanga tlawhtu la tam ber ṭum a ni.

Statistical in-charge, Tourism Department in a tarlan danin kumin hian festival hi foreign tourist 2401 in an tlawh a, ramchhung hmun dang aṭangin tlawhtu 38,700 an awm bawk. Tualchhung mi 2,02,113 in festival hi an chhim bawk a ni. Festival khar ni hian mi 66,474 vel an kal bawk a ni.