Tripura Trinamool MLA hlui paruk BJP Legislator-ah pawn an ni ta

Tripura Assembly Speaker Ramendra Chandra Debnath chuan thla li kaltaa Trinamool Congress (TMC) chhuahsana Bharata Janata Party (BJP) zawmtu MLA paruk te chu BJP Legislator atan pawn an nih thu Pathianni khan a puang.

Assembly Speaker chuan, "'TMC MLA hlui parukte chu BJP Legislator-ah pawm an ni. BJP MLA-a pawm an nih vang hian hamṭhatna engmah an nei chuang lo ang" a ti.

Chandra Debnath chuan November 8-a heng MLA paruk ten BJP Legislator nih an dilna chu TMC Chairperson hnenah ni 14 chhung notice a thawn thu sawiin chhanna leh dodalna engmah a hmuh loh avangin BJP Legislator atan hian a pawm tih a sawi.

August 7 khan Sudip Roy Barman kaihhruainain Tri­namool MLA panga - Ashish Kumar Saha, Diba Chandra Hrangkhawl, Biswa Bandhu Sen, Pranjit Singh Roy leh Dilip Sarkar bakah TMC hruaitu leh workers 100 chuang chuan BJP an zawm a ni.

MLA paruk te hian Inrinni khan BJP Legislator atana pawm an nihna lehkha hi Assembly Secretary Bamdeb Majumder hnen aṭangin an dawng tawh a, Pathianni khan Assembly Speaker hian mipui hriatah a puang chiang ve leh bawk a ni.

Speaker hian Assembly Session tawp niah a puan avang hian Assembly house-ah pawh titi a ti tam hle niin report chuan a tarlang.

Tripura-a sorkarna chang mek Communist Party of India - Marxist (CPI-M) te chuan House-ah hian member 51 an nei a, Congress chuan pathum chiah an nei thung. Hetih lai hian MLA paruk te BJP Legislator atana pawm an nih tak avang hian BJP hian House-ah member an nei ve ta a ni.