AP hi NHIDCL Portfolio lian ber a ni : NHIDCL MD

National Highways & Infrastructure Development Corporation Limited (NHIDCL) Managing Director Nagendra Nath Sinha leh a team te chuan, Arunachal Pradesh Chief Minister Pema Khandu chu a office-ah kar kal ta Inrinni khan meeting neihpuiin thil pawimawh ṭhahnem tak an sawiho.

He meeting-ah hian Arunachal Deputy Chief Minister Chowna, Chief Secre­tary Satya Gopal leh Commissioner PWD B Pertin te pawh telin NHIDCL in Arunachal-a kawngpui (highway) siam hna a kalpui mek chungchang an sawi ho.

Managing Director chuam kawngpui 19 siam hna kalpui a nih mek thu leh kawngpui dang 11 siam hna kalpui leh a nih tur thu a sawi a, heng kawngpui siamna tur hmun hi ram thenfai a la ngaih avangin an la kalpui lo niin a sawi.

Nath Sinha chuan Arunachal chu NHIDCL Portfolio lian ber a nih thu sawiin, km 1000-a thui kawngpui siam hna kalpui a nih thu a sawi a, kawngpui siam nan hian cheng vaibelchhe 14000 invest a nih thu a sawi bawk.

Sinha chuan project zawng zawng hi zawh a nih hunah chuan Arunachal chuan kawngpui ṭha tak a neih dawn thu a sawi a, an corporation chuan khaw chhungah skill development a kalpui mek thu a sawi bawk. Trainee te pawhin khawl hman dan midang an zirtir mek thu a sawi bawk a ni.

Chief Minister Pema Khandu chuan state sorkar in NHIDCL hnathawh chu a theih ang tawka a ṭanpui tur thu a sawi a, ramngaw thenfai leh quarry license chungchangah hma a lakpui tur thu a sawi.

He meeting-ah hian Trans Arunachal Highway chungchang te, East-West Industrial Corridor leh Frontier Highway chungchang te an sawi ho a ni.