Assam-ah rel in sai paruk su hlum

Assam-a Sonitpur District-ah Pathianni zing khan rel chak taka tlanin sai paruk a sut hlum thu official thuchhuah chuan a tarlang.

Northeast Frontier Railway (NFR) official thuchhuah in a tarlan danin relin sai a sut hlum­na hi Assam-a Balipara leh Dhalaibeel station inkarah a ni a, non-notified area-ah a nih thu a sawi bawk.

Tualchhung mite chuan zing dar 1.30 AM velah sai hi sut a nih thu an sawi a, sai rual 30 velin rel kawng an kan lai takin Guwahati-Naharlagun Express rel hi chak taka rawn tlanin sai paruk lai chu a su hlum ta a ni.

Official te chuan rel hi a speed a chak tawh em avangin an ding hman tawh lo niin an sawi a, NFR Rangiya division chuan he thil thlen hnu aṭang hian henglai area-ah hian 30 kmph aia chaka rel tlan tawh lo turin hriattirna an chhuah ve nghal bawk.

Nov. 19 khan Guwaha­ti-ah sai pahnih chu relin a lo su hlum tawh bawk a ni.

Assam Environmental NGOs Forum chuan sai sut hlum an nih leh ta chu pawi an tih thu an sawi a, wildlife NGO Aaranyak Bibhab Talukdar chuan ni 100 chhung leka natna vang ni loa sai 40 lai in nunna an chan ta chu pawi a tih thu a sawi.

Ramsa humhalhtu pawl hrang hrang chuan Assam sorkar chu ramsa te venhimna kawnga hma nasa zawka la turin an lo ngen ve bawk a ni.