Meghalaya HC-in Assam-Meghalaya ramria inremna siam a stay-sak

Meghalaya High Court chuan kumin March thlaa Assam leh Meghalaya sorkarin ramri buaina an neihna, hmun 12 zinga hmun paruka inremna an siam chu Ningani khan a stay sak. Stay order nakkum February 23-a hearing an neih leh hma hman a ni ang.

March 29 khan Assam chief minister Himanta Biswa Sarma leh Meghalaya chief minister Conrad K Sangma-te chuan hun rei tak buaina an lo neih tawh, ramri hmun parukah inremna hi an ziak a ni. Union home minister Amit Shah chuan inremna an siam hi thil chhinchhiah tlak leh hriatreng tur a nih thute a sawi.

Assam leh Meghalaya CM-ten inremna an ziahah hian, hmun parukah ramri buaina an neih mekna, sq km 36.79-a zau chu Assam lamin sq km 18.51 changin, Meghalaya lamin sq km 18.28 chang turin an inremsiam. Survey of India-te nena an enfiah hnuah, ramri hi siamṭhat turin an ti a ni.

Mahse state pahnihten inremna an siam chungchangah hian Khasi Hills Autonomous District Council hnuaia Syiemship leh Sirdarship hotu palite chuan High Court-ah petition an thehlut a, memorandum of understanding ziah dawn hian biakrawn an ni lo tih an sawi. KHADC chu land, water, soil, local customs leh culture chungchangah thuneihna pek a ni a, hei vang hian engmah rawn loa state pahnihten inremna an ziah hi Sixth Schedule bawhchhiatna a ni, an ti.

Ningani khan High Court chuan an petition thehluh hi ngaihtuahin, petition thehluttu aiawha ding advocate P Sharma chuan inremna an siam tawh anga ramri hi siamṭhat a nih hman chuan hma la lo tura ngenna chuan awmzia a nei thei tawh dawn lo a ni, a ti.

Hetih lai hian sorkar lam aiawh, advocate general A Kumar chuan High Court chu interim order siam lo turin a ngen a, state pahnihte inremna siamah hian petition thehluttute chuan engmah hloh leh chan tur an nei phah dawn lo niin a sawi thung.

Mahse Meghalaya High Court chuan inremna an lo ziah tawh chu kaltlangpui rih loh turin 'stay' order a tichhuak a, hearing neih leh hmain sorkar laipui pawh affidavit thehlut turin a ti nghal bawk.