Nagaland CM micro finance initiative scheme kalpui dan thlirho

Nagaland chief secretary J Alam kaihhruaiin Ningani khan chief minister microfinance initiative (CMMFI) scheme kalpui dan an thlirho.

Chief secretary office-a meeting-ah hian sorkar official-te bakah bank lam aiawhte an tel. District level implementation-cum-monitoring committee chairman, DC-te leh member-te pawhin video conference hmangin an tel ve bawk.

J Alam chuan CMMFI scheme chu Nagaland sorkar flagship programme pahnih zinga pakhat a nih thu sawiin, a hmain Chief Minister’s Health Insurance Scheme (CMHIS) siam a lo ni tawh bawk tih a sawi. DC tinte chu he scheme hi ngai pawimawh tur leh, a taka kalpuina kawnga hma hruaitu nih tum turin a chah. December 15 hian an district ṭheuhah awareness programme buatsaih ṭheuh turin a ti bawk.

Agriculture production commissioner Y Kikheto Sema pawhin CMMFI chu hetiang lam scheme an state-a an siam ṭum khatna a ni tih sawiin, he scheme hmang hian project thawhna tur aṭang hian 60% chu bank lamin loan-in a pe a, 30% chu state sorkarin subsidy-in a pe a, a thawktu tur chuan 10% chauh a thawh ve a ngai a ni, a ti. CMMFI scheme chuan ṭhalai 1500 vel mahnia eizawnna kawng a siamsak thei dawn a ni, a ti.