Silchar-a zirna in-ah zirlai lut tharte hostel hranah awmtir dawn

Assam-a Dibrugarh Univeristy leh Silchar Dental College-a zirlai lut tharte tihduhdahna, ragging thleng avangin state chhunga zirna in hrang hrangte chuan hetiang thil a thlen tawh lohna turin hma an la a, Silchar-a zirna-inah chuan zirlai lut tharte chu hostel hranah awmtir an tum.

Silchar Medical College and Hospital(SMCH), National Institute of Technology (NIT) Silchar leh Assam University Silchar chuan campus chhunga ragging thleng ṭhin venna atan he ruahmanna hi an siam thar a ni.

SMCH principal, Dr Babul Kumar Bezbaruah chuan, "First year zirlaite chu hostel hranah dah an ni ang a, campus chhungah ragging a thleng em tih pawh uluk taka thlithlai reng a ni ang. Zirlaite pawh kan kawm ṭhin dawn bawk a ni," a ti.

Assam University Silchar pawhin thuchhuah siamin, zirlaite chu ragging ti lo tura intiamna ziak vek turin a ti. University proctor Dr Himandri Shekhar Das chuan Supreme Court chuan zirna ina ragging tih hi a khap tlat tih sawiin, an university-ah pawh hetiang ti an awm chuan hremna na tak pek an nih tur thu a sawi.

NIT Silchar registrar Prof KL Baishnab chuan an campus-ah ragging khap tlat a nih thu leh, committee pawhin kum eng emaw chen aṭang khan hetiang thil a thlen lohna tura an thlithlai reng thu a sawi. First year zirlaite chu a hrana awmtir an ni dawn tih a sawi bawk.