Assam-ah pafa kap hlum
Assam-a Tinsukia district-a Bordumsa-ah Thawhṭanni khan an khaw Village Defence Party (VDP) President leh a fapa chu mi tu tih hriat lohin an kap hlum tih official thuchhuah chuan a sawi.
District Superintendent of Police (SP) Mugdha Jyoti Mahanta pawhin he thil thleng hi a enfiah tawh a ni. Silai hmetpuaktu hian Bordumsa Police Station huamchhunga Hunjan Simalguri thingtlang khuaah VDP President Anteshwar Mahanta (45) leh a fapa Karun Mahanta (23) te hi a kap a, hliam na tak tuarin damdawi-in an panpui laiin an hliam tuar lo in an boral tih Police te chuan an sawi. A fapa zawk Karun hi Kakopathar Regional Students’ Union President hlui a nih thu police te chuan an sawi bawk.
Assam Chief Minister Sarbanada Sonowal pawhin pawikhawihna thleng hi a dem thu a sawi nghal a, democracy ramah hetiang pawikhawihna rapthlak lutuk a thleng chu sorkar chuan a en liam mai dawn lo a ni, tiin pawikhawihtu chungah action lak ngei a nih tur thu a sawi.
Chief Minister chuan police te chu pawikhawihtu zawngchhuak vat turin a ti bawk. Police official-te chuan thil thleng hi an hriat velah pawikhawihna hmun hi an pan thu an sawi a ni.