AP Dy CM-in Bari lui chunga lei dawh tur lungpum phum

Arunachal Pradesh Deputy Chief Minister Chowna Mein chuan Thawhṭanni khan Notun Kheti khaw bula Bari lui kanna tur lei dawhna tur lungphum a phum.

Notun Kheti hi state khawpui, Itanagar aṭanga km 220 vela hlaa awm a ni a, an district khawpui Deomali aṭang chuan km 38 vela hla a ni thung. He lei an dawh tur hi thingtlang khaw paruk Longkhong, Makat, Subang, Lamlo, Notun Kheti leh Khela kalpawh theihna tur a ni. Report in a tarlan danin mi 1741 velin ṭangkai takin an hmang thei dawn a ni.

Heng khaw kalpawhna tur hian kawngpui siamna tur project cheng nuai 2780 chu CRF in an pe a, PWD ten hnathawh hna erawh an kalpui thung. He kawngpui siam mek km 38 a thui siam turah hian km 26 chu ṭha taka an zawh tawh thu tarlan a ni.

An kawngpui siam hi kawng hlui awmsa aiin km 12 laiin a hnai dawn zawk a ni.

Chowna Mein chuan inkal­pawhna a ṭhat loh chuan hma­sawn a har thu a sawi a, state sorkar chuan tourism, agriculture leh horticulture sector lamah hma nasa taka a lak thu sawiin heng hian an state economic dinhmun a chawikang thei dawn niin a sawi. He lei in a pawh theih tur khuate hian khualzin mite hip nan theihna an neih thu a sawi a, loneimite pawh lei dawh a nih hunah chuan an dinhmun chawikan nan a la ṭangkai dawn niin a sawi bawk.