Arunachal-ah NSCN-K mi kaphlum

Security force-te chuan Naga helpawl, National Socialist Council of Nagaland - Khaplang (NSCN-K) mi ni ngeia hriat Arunachal Pradesh Longding district-a Tissa thingtlang khuaah an kahhlum thu defence thupuangtu chuan a sawi.

Intelligence te hnen aṭanga NSCN-K ten khua an bei nia an thu dawn bawhzuiin, Assam Rifles Khonsa battalion te chuan Tissa khua hi Thawhṭanni khan an dap a, security force te an hmuh velah hian hel pawl mi nia hriat pahnih te chuan tlanchhiat an tum nghal a ni. Tlanchiat an tum pah hian silai an hmet puak bawk a, hei hi Security force lam chuan chhanglet nghalin pakhat zawk chu an kap hlum ta a ni.

Defence thupuangu Col Chiranjeet Konwer chuan pakhat zawk chu thimthamah a tlanbo hman thu a sawi.

An mi kahhlum tak kut aṭang hian Colt pistol pakhat, radio set leh documents eng emaw zat an man tel bawk. Konwer chuan an mi kahhlum hi tunge a nih hriatfiah an tum mek thu a sawi a, tlanbo ta zawk pawh an zawn mek thu a sawi bawk.