Assam CM in Brahmaputra lui nut chungchang PM sawipui China in an puhna pha

Assam Chief Minister Sarbanada Sonowal chuan Brahmaputra lui nut leh bawlhhlawh chungchangah Prime Minister Narendra Modi chu hma la turin a phut thu sawiin Thawhlehni khan PM hi a hmu.

Sonowal hian Thawhlehni khan New Delhi-ah Prime Minister Narendra Modi chu hmu in Brahmaputra lui chungchang hi a sawipui a ni. He inkawmnaah hian Union Home Minister Rajnath Singh, Finance Minister Arun Jaitley, Minister of Road Transport, Water Resources and River Development Nitin Gadkari leh External Affairs Minister Sushma Swaraj-i te pawh an tel.

Prime Minster chuan Sonowal-a hnenah sorkar laipui chuan Brahmaputra chungchang hi a la thutak hle niin a hrilh a, Central Water Commission te pawhin lui dinhmun hi an enfiah dawn thu leh Ministry of Water resources pawh hma la vat tura a hrilh thu a sawi.

Narendra Modi chuan depart­ment dang te pawh Ministry of Water Resources te hmalakna chu thlawp tur leh, lui nu pawh science thiamna hmanga a dinhmun chiang zawk test nei turin a ti bawk. Modi chuan External Affairs Ministry pawh he lui nut chhana an puh ramte nena inbiakna nei turin a ti a, lui nut leh bawlhhlawh chhan chhui chhuak turin a chah bawk a ni.

External Affairs Minister Sushma Swaraj chuan Brahmaputra chungchangah hian China pawh an biak tawh thu a sawi a, lui bawlhhlawh chhan zirchianna an neih mek thu a sawi.

Meeting-ah hian Sonowal chuan Director General of Emergency and Fire Services A.P. Rawat hnen­ah lui tui zirchianna tur sample 15 Jonai aṭanga Dhuburi inkara mi la tura sorkarin an tih thu a sawi a ni. Heng tui sample an lak te hi Emergency and Fire Services Depart­ment chuan Institute of Chemi­cal Technology, Hyderabad leh IIT, Guwahati-ah zirchian tura an thawn tawh thu a sawi bawk.

China in lei verh nia puhna pha : Brahmaputra lui nut chungchanga buaina leh a chinfelna zawn mek a nih lai hian lui nut chhana an puh ber China chuan lui bawlhhlawh chhanah engmah inhnamhnawihna an nei lo niin a sawi thung.

Brahmaputra/Siang lui nut chhanah hian mi tam takin China chu puhin, China aṭanga rawn luang lut Siang lui hi China chuan a kuang sawn turin lei a verh chiam niin an sawi a, mahse hei hi China chuan a pha a ni.

China Foreign Ministry thu­puangtu Lu Kang chuan China dinhmun a tihchian duh thu sawiin,"India in China-in project a kalpui mek nia a sawi ziah hi ka la hre ngai lo" a ti. Kang chuan India chuan thu belhchian dawl lo an sawi tawh loh a beisei thu a sawi bawk.

China hian October thla khan Brahmaputra lui kuang sawn nan kn 10,000-a thui lei verh hna a kalpui nia sawi a ni a, mahse hei hi an pha thung a ni. Hetih lai hian Brahmaputra/Siang lui nut chhan hi mumal taka sawi theih a la awm lo a ni.

Assam in kawng hrang hranga an rin ber Brahmaputra lui hi China aṭanga lo luang lutin China-ah hian Yarlung Tsangpo tia hriat a ni a,Arunachal Pradesh-ah rawn luang lutin Siang lui tiin an lo vuah leh a, Assam a luan luh hnuah Brahmaputra tih a ni leh ta a ni. Kum dangah chuan tun ang hunah hian a lui hi a nu ngai lo a ni.