Manipur, Kerala leh Mizoram tan Rs vbch 305

Sorkar laipui chuan Manipur, Kerala leh Mizoram-a khuarel chhiatna hrang hrang thleng tuarte ṭanpui nan cheng vaibelchhe 305 a pek dawn thu Home Ministry chuan a tarlang.

He thutlukna hi Home Minister Rajnath Singh kaihhruaina hnuaia meeting an neihnaa siam a ni a, meeting-ah hian Agriculture Minister Radha Mohan Singh leh Union Home Secretary Rajiv Gauba bakah mi pawimawh eng emaw zat an tel a ni.

Sorkar laipui aṭanga ṭanpuina dawng tur zinga Manipur leh Mizoram hian tuilian leh leimin an tawrh nasat vanga dawng tur an ni a, Kerala erawh hi chu kumin chhunga khawkheng nasa tak an tawrh vang a ni thung.

Committee thuchhuak chuan Manipur hnenah cheng vaibelchhe 130.65 pek turin thutlukna an siam a, National Disaster Relief Fund (NDRF) aṭanga pek tur an ni. Kerala tan hian cheng vaibelchhe 125.47 pek a ni dawn thung a, 112.05 hi NDRF aṭangin pek a ni ang a, vaibelchhe 13.42 chu National Rural Drinking Water Programme (NRDWP) hnen aṭangin a ni thung ang. Mizoram tan hian cheng vaibelchhe 49.02 dah a ni thung a, NDRF aṭangin veibelchhe 42.77 leh NRDWP aṭangin cheng vaibelchhe 6.25 pek an ni ang.