Hmarchhak bial pumah NESO-in 'Black Day' hmang

Hmarchhak zirlai pawl intelkhawmna, North East Students' Organisation (NESO) chuan Citizenship (Amendment) Act (CAA) duh lohna lantirin nimin khan hmarchhak bial pumah 'Black Day' an hmang.

Kum 2019, December 11 khan Rajya Sabha chuan Pakistan, Afghanistan leh Bangladesh aṭanga India rama pem lut, Muslim sakhaw tel loin sakhaw dang zuitute hnena India khua leh tui nihna pekna tur, Citizenship (Amendment) Bill a pass a ni. NESO chairman Samuel Jyrwa chuan he bill pass ni, December 11 chu hmarchhak bial pumah 'Black Day' tia hriatreng a ni tawh ang, a ti.

NESO hnuaia hmarchhak state hrang hranga zirlai pawlte chuan nimin khan CAA dodalna lantir nan an state chhunga hmun pawimawh hrang hrangah flag dum an zar, "Kan thiltih hi sorkar laipui hnenah CAA, 2019 hi kan dodal tlat a ni tih kan hriattirna a ni," tiin Jyrwa chuan a sawi.

Hmarchhak mipuite pawh he dan sakei dodalna kawnga inlungrual tlat turin Jyra chuan a ngen a, he dan hi hmarchhak leilung faten harsatna an tawh phahna tur, politics hmanga dik lo taka an chunga relsakna a ni tiin, "Leilung faten nasa taka an dodal chungin sorkar laipui chuan Parliament-ah a pass lui tho a ni," a ti.

Kum 2019-a Parliament-a bill a pass hnuah hmarchhak pumah leh ramchhung hmun dangah duh lohna lantirin, hmun tam takah tharum thawhnate a chhuak hial a ni.

CAA hi pass ni tawh mah se, rules tihfel a la nih loh avangin a taka kalpui a la ni lo. Sorkar laipui chuan Covid hrileng vangin rules hi siam fel a la ni lo niin a sawi. Rules hi peihfel thuai tum a nih thu leh, siam fel a nih veleh a taka kalpui nghal a nih tur thu a sawi.