Delhi-ah North East Festival hmang leh dawn

Ni li awh tur North East Festival vawi 10-na chu December 23 aṭang hian New Delhi-a Jawaharlal Nehru Stadium-ah hman a ni leh dawn.

Kum 2019 khan Delhi-ah North East Festival hi hman a lo ni tawh a, kum 2020 leh 2021 erawh chu hri leng vangin hybrid mode-in Guwahati-ah hman a ni thung.

Delhi-a festival hman turah hian musical band 30 leh artist 500 chuang leh fashion designer 16 an tel dawn a, food stall 60 siamin, MSME business 100 chuang bakah tour operator eng emaw zat an tel bawk ang.

Festival organiser Shyamkanu Mahanata chuan hmarchhak chu rampawn lam leh ramchhung hmun danga mite tan tourist destination lar tak a ni chho zel tawh tih sawiin, "Hmarchhak bial chungchang kan sawi dan pawh a danglam tawh hle. A hma chuan hel leh buaina hmun tia sawi thin kha North East Festival hian a rawn thlak danglam a, ei tur dangdai tak tak, music, fashion, culture leh khualzinte tlawh duh hmun titein kan sawi tawh zawk a ni," a ti.

Union culture minister G Kishan Reddy chuan festival hawng tura beisei a ni a, law minister Kiren Rijiju, cabinet minister Piyush Goel leh Sarbananda Sonowal bakah sorkar official eng emaw zatin an hmanpui beisei a ni bawk.