Loneitute hnena sem tur Rs vbc 1,500 loan laah Meghalaya sorkar puh

BJP chuan Meghalaya-a National People's Party (NPP) kaihhruai Meghalaya Democratic Alliance (MDA) sorkar chu nakkum assembly inthlan neih tur vangin, vote zawnna atan loneitute hnenah sem tura loan, Rs vbc 1,500 laah a puh.

State BJP chief Ernest Mawrie chuan NPP chuan sum sem dawngtute hnenah hei hi an party programme anga lantir an tum niin a sawi.

NPP hotu, chief minister ni bawk Conrad K Sangma chuan kar liam ta khan state chhunga loneitu mi 53,000 chu FOCUS+ scheme hnuaiah Rs 5,000 ṭheuh a sem a ni

Mawrie chuan CM Sangma kaihhruai sorkar chuan inthlan lo awm tur thlirin, vote zawnna atan foreign investor-te hnen aṭangin Rs vbc 1,500 chuang a puk a ni tiin, "State mipuite chu fimkhur turin ka duh a ni. Rs 5,000 in lo dawng a nih chuan a thlawn a ni dawn lo a, nakinah loan rulhna tur hi a pung nen in la pek a ngai maithei a ni," a ti. State sorkar chu FOCUS+ scheme atana a sum hman chu khawi aṭanga a hmuh nge tih sawifiah turin a phut bawk.