Sushma Swaraj leh China Minister ten Siang lui chungchang sawi dun

External Affairs Minister Sushma Swaraj leh China Foreign Minister Wang Yi te chuan Thawhlehni-a Delhi-a inkawmna hun an hmanah Siang/Brahmaputra lui nut chungchang an sawi dun niin Ningania official thuchhuah chuan a tarlang.

External Affairs Ministry thupuangtu Raveesh Kumar chuan hemi chungchang hi tarlangin, Brahmaputra lui nut chungchanga hmalaknaah hian Ministry of Water Resources an thawhpui thu a sawi bawk.

Kumar chuan ram pahnihten inbiakna an neih chungchang hi sawiin EAM Meeting-ah hian Siang lui nut chungchang pawh an sawidun ngei niin a sawi. Kumar chuan lui chungchang ngaituah hian ram pahnihte hian hmalak dan tur te an sawi dun a ni, a ti.

Arunachal Pradesh-a Siang lui hi Assam-a luan luh hnuah a Brahmaputra tia hriat ni lehin he lui nut chhanah hian a lui hnar awmna China ram chu puh a ni. Union Minister hlui Ninong Ering pawhin Prime Minister Narendra Modi hnenah lehkha thawnin lui nut chhan hi China in a ram chhunga lui kuang sawn tuma hna a thawh vang a nih zia chiang takin a lo ziak tawh a ni.

Kumar chuan lui nut chhan hi chhui mek a nih thu a sawi a, lui tui hi mihring hman tlak loh khawpa a bawlhhlawh tawh thu report tam takah tarlan a ni tawh bawk.