Sonowal leh Gadkari ten Assam kawngpui chungchang sawi dun

Assam Chief Minister Sarbananda Sonowal chuan Nilaini khan Union Minister Nitin Gadkari chu New Delhi-a a office-ah kawmin, Assam chhunga kawngpui hmanga inkal pawhna chungchang an sawidun tih official te chuan an sawi.

Chief Minister chuan Guwahati khaw zauhna atana state caiptal region (SCR) area-a kawngpui hmanga inkalpawhna te, highway leh lawng hmanga inkal pawhna lamah te hmasawnna tam tak a thlen avangin Union Minister chu a fak hle a, Assam state capital a inkalpawhna a awlsam zawk theih nan ring road siam turin ruahmanna a siampui bawk a ni.

Union Minister pawhin CM ruahman­na siam chu ṭha a tih thu leh a pawm­pui thu a sawi a, ring road siamna tur ram awl lo ngaihtuah turin a hrilh bawk niin official te chuan an sawi.

State sorkar pawhin hma lak vat a tum niin an sawi a, Sonowal chuan ring road siam a nih chuan Guwahati-a traffic jam pawh a ziaawm dawn thu a sawi. Ring road chuan SCR area a chei dawn nia sawiin, inkalpawhna lamah pawh hmasawnna a thlen dawn a ni, a ti.

Meeting-ah hian Sonowal chuan Gadkhari hi cheng vaibelchhe 237 senga project Majuli-a kalpui chu December 29-a hawnna nei turin a sawm nghal a, official thuchhuah chuan Union Minister in sawmna hi a pawm thu an sawi bawk. He project hi Majuli thliarkara erosion venna tur a nih thu CM chuan a sawi.

Inkawmna an neihah hian Brahma­putra lui lehlam lehlama express highway siam hna kalpui dan tur pawh an sawi niin official te chuan an tarlang bawk.