Modi-a'n Meghalaya sorkar sawisel, BJP tan a campaign nghal

Prime Minister Narendra Modi chuan Inrinni khan Megha­laya a tlawh a, Congress kaih­hruai Meghalaya United Alliance sorkar chu na takin a sawisel. Congress kaihhruai sorkar chu mipuite bum ṭhinah a puh a, hetih lai hian Bharata Janata Party (BJP) erawh mipuite hmasawnna chiah ngaih­tuah ṭhin an nih thu a sawi thung.

Narendra Modi chuan central aṭanga fund kal tih loh chu Megha­laya state chhungah hma­sawn­na dang hmuh tur a awm lo niin a sawi a, Comptroller and Auditor General report aṭanga alan danin, kum ruk kalta chhung khan cheng vaibelchhe 908 lai mai hmanna hriat mang loha a riral thu a sawi a ni. Shillong Polo Ground-a thu a sawinaah Modi chuan, "Congress leh Nationalist Congress Party kaihhruai ṭangrual sorkar hian mipui duh dan a ngaituah lo a, misualte kuta lungalhthei khur pawh a hlan a ni. Mipuite hian sorkar ṭha tak neih an phu a, congress sorkar hi paihthlak a hun tawh a ni" a ti.

PM Modi hian Inrinni khan hmarchhak state pahnih Mizoram leh Meghalaya a tlawh a, project pahnih a hawng a ni. Modi chuan BJP thiltum ber chu hmaswnna chak leh hmun kilkhawr ber thleng phak hmasawnna a nih thu a sawi. Kawng engkimah hmasawnna a awm theihna turin BJP chuan hma an lak zel tur thu a sawi. Inthlan lo awm turah pawh mipuite duhdan leh mipuite ṭhatna tura hnathawk tur sorkar thlang thurin mipuite chu a chah a, Meghalaya chu thlak danglam tura hna an thawh ho tur thu a sawi bawk.

Narendra Modi chuan Cong­ress-in kum 15 chhung lai ro an rel tawh chung pawha Shillong mipuiten tui thianghlim in tur an la neih loh thu a sawi bawk a, Congress sorkar chuan inbumna leh inbumna kawng bak an sial lo a ni, a ti. Chief Minister Mukul Sangma pawh sawiselin, state chhungah health care facility a chhiat thu a sawi a, doctor leh nurse awm lohna health centre a tam hle a ni. Sorkar damdawiinah pawh doctor leh nurse indaih lohna a tam thu a sawi bawk.

Naupang tamtak uluk taka enkawl ngai hmun kilkhawrah an la tam thu sawiin, PM chuan an state chhunga zirtirtu 70% chu training paltlang lo an nih thu a sawi bawk. Sorkar lower primary school-ah zirtirtu 1,700 lai mai mamawh an nih thu a sawi a, Rymbai-Bataw-Borkhat-Jalalpur kawngpui siam project kalpui tum mek state sorkarin a hlawhchham pui ṭhak thu a sawi lang. He project atan hian 2011 khan sum pawh sanction vek a nih tawh thu a sawi bawk.

Hna tihkhawtlai a nih chhan pawh state sorkarin project kalpuina tur Utilization Certificate an thehluh loh vang a ni, a ti. Huroi thingtlang khaw miten 2018 assembly election boycott an tum chungchangah Modi chuan tu in nge hetiang thil liantham titur hian mipuite hi an fuihpawrh a ni a tibawk.

Prime Minister hian Inrinni vek khan Upper Shillong Helipad aṭangin Guwahati a pan a, heta ṭang hian Delhi a pan leh nghal a ni.