Manipur HC-in Insawifiah turin RIMS hriattir

Manipur High Court chuan Regional In­sti­tute of Medical Sciences (RIMS), Imphal ami chu post graduate zir­laiin Prime Minister hnena hekna a thawn chung­changah December 20-a insawifiah turin a hriat­tir. PG zirlai hian Prime Minister hnenah hman­raw ṭha neih loh vang leh healthcare facility neih ṭhat loh vangin RIMS hekna lehkha hi a thawn a ni.

He hriattirna hi Zir­tawpni khan a chhuak a, Justice N. Koteswor, acting Chief Justice leh Justice Kh. Nobin kaih­hruai division bench chuan thuchhuah hi an siam a ni. Hemi chungchang enfiah tura High Court-in committe a dinten report an thehluh bawhzuiin thuchhuah hi siam a nih tarlan a ni.

Affidavit hi December 12-a thehlut tura hriattir an lo ni tawh a, mahse RIMS lam hian an thehluh loh avangin December 20 thleng hian hun pawhsei sak leh an ni ta a ni.

RIMS dinhmun enfiah tura member pathum awmna committee dinte chuan an zirchiannaah MRI equipment ṭnekhat chu thla li aia tam a hman theih tawh loh thu an sawi a, damdawiina an hmanraw dang tamtak pawh a hmantlak tawh loh thu an sawi. Tarlan dan chuan Union Health Ministry in damdawiin thuam ṭhatna tura pawisa mamawh zawng zawng a sanction vek tawh a, mahse hna hi thawh a ni lo niin an sawi.

RIMS hi 1972-a din niin hmarchhak state pariat zirlaite tana din a ni a, tunah hian a dinhmun a ṭha lo hle a ni. Kum thum aia tam director mumal an nei tawh lo a, Health Ministry in director tur interview hi kalpui daih tawh mah se, result hi tun thlenga tihchhuah a la ni lo bawk.

RIMS Dental College intern te chu kar kalta Ningani aṭanga khan an strike tawh a, stipend an hmuh loh vanga strike an nih thu official te chuan an sawi bawk.