Meghalaya state-in award a dawng

Meghalaya sorkar chuan health and wellness centre (HWC) dinna tura an state target a khum avangin sorkar laipui hnen aṭangin award a dawng.

Kum khat chhunga HWC din leh kalpuina tura state target hi 430 a nih laiin, centre 448 a hawng hman a ni.

HWC 448 zingah 18 hi urban area-ah awmin, a bak chu rural area-a awm a nih thu health services joint director Rilynti Lyndoh chuan a sawi. "Kan target kan khum thei leh, hemi kawnga state hmalakna sorkar laipui lamin min hriatsak hi lawmawm kan ti hle a ni," a ti.

Ministry of Health and Family Welfare buatsaihin Varanasi-ah December 10 khan Universal Health Coverage Day hman a ni a, he hunah hian an target an tlin avangin Meghalaya sorkar hnenah award an hlan a, Lyngdoh leh Meghalaya-a National Health Mission director Ram Kumar-ten an dawng a ni.

Meghalaya hian health and wellness centre hrang hrang aṭang hian kum khat chhungin tele-consultation service 60,000 a pe hman bawk a, hmarchhak state zingah a tam ber dawttu an ni.