India ram khaw tinah RSS branch a awm a ngai : Mohan Bhagwat

Rashtriya Swayamsevak Sangh (RSS) hotu Mohan Bhagwat chuan Pathianni khan RSS Assam unit workers camp hmanpuiin, India rama khaw tinah RSS branch a awm a ngai a ni, a ti.

Mohan Bhagwat chuan India rama cheng tupawhin ram hmasawnna chu an dah pawimawh hmasa ber tur a ni tiin, RSS member tin pawh ram tana theihtawp chhuah turin a chah. Ni thum awh RSS workers camp hi Chandrapur, Guwahati-a Chandrapur Vidyabharati School-ah neih neiin Pathianni khan a ṭiak a ni. He hunah hian RSS worker sang hnih chuang an tel.

Bhagwat chuan, "Kum 1925 khan mipuite tihhmasawnna atan Dr Keshav Baliram Hedgewar chuan RSS hi a din a, ka ram tan engkim ti thei turin kan inpeih reng tur a ni," tiin RSS chuan kum 100 a tling dawn hnai tawh a, ram tan thawkin kumtin mi thar tam takin an zawm belh zel tih a sawi. Ram tana theihtawp chhuahtu, mahni hamṭhatna tur ngaihtuah loa khawtlang leh ram tana inpe RSS worker-te chu a fak bawk.