Hornbill Festival 2022 chhimtu mi nuai 1.4 an tling

Nagaland sorkarin ni 10 awh, Hornbill Festival 2022 a buatsaih chu December 10 khan a ṭiak a, December 1-10 chhungin festival chhimtu hi mi 1,40,299 an awm.

Festival chhimtu zinga mi 90,860 chu state chhung mi niin, state dang aṭangin mi 48,413 leh ramdang mi, foreign tourist 1,026 in an chhim bawk a ni. Festival tawp ni, December 10 kha chhimtu an tam ber ni niin mi 22,546 in an chhim a, domestic tourist 7,894 leh foreign tourist 67-ten an chhim.

Festival chhimtu an tlem ber ni chu a ni ngana niin, mi 9,158 in an chhim a ni. Ni dangah chuan chhimtu hi 11,000 chuang an tling ziah thung.

Nikum khan Hornbill Festival hi December 1-4 chhung chauh neih a ni a, festival neih laia Mon district-a security force-ten civil mi 14 an kahhlum avangin festival pawh hi tihtawp zui ve nghal a ni. December 1-4 chhung khan chhimtu mi 56,356 awmin, an zingah foreign tourist 54 leh domestic tourist 14,538 an tel a ni.

'Festival of festivals' tia sawi ṭhin, Hornbill Festival hi Nagaland sorkar in Nagaland culture hausa leh dangdai tak chawisan a, Naga hnam hrang hrangte inkara inpawhna ṭha siamna tur a buatsaih ṭhin a ni a, ni 10 chhung hian festival chhimtute chuan Naga hnam hrang hrangte culture-te an hmu thei a ni. He festival hi kum 20 buatsaih tawhin, kumtin chhimtu hi an pung zel a, India ram chhung mai ni lo, ram pawn lam thleng pawhin hriat a hlawh chho zel.