Mukroh inkahna thlenga thi chhungte zángnadawmna pek tur tipung

Meghalaya deputy chief minister Prestone Tynsong chuan Assam nena an inrina bul, Mukroh khuaa Assam police-te silai hmehpuaha thi chhungte hnena zangnadawmna pek tur chu an tipung dawn tih a sawi.

State sorkar hian Mukroh-a inkahna thlenga thi chhungte hnenah Rs nuai 5 pek an nih tur thu a lo puang tawh a ni.

Mahse Dy CM Tynsong chuan state revenue department hnenah mitthi chhungte zangnadawmna tam zawk pek tur chungchangah provision-te siamṭhat turin hrilh an ni a, department lam hian an buaipui mek a ni, a ti. Mitthi chhungte sorkar hna pek dan tur pawh state sorkar chuan a ngaihtuah mek bawk niin a sawi.

November 22-a Assam leh Meghalaya ramri bul, Meghalaya state chhung Mukroh khuaa buaina chhuahnaa Assam police-te silai hmehpuahah mi paruk an thi a, an zinga panga chu Meghalaya mite an ni. State pahnihte chuan he buaina chhuak hi ramri buaina an neih kaihhnawih thil a ni lo tih an sawi ve ve a, mahse national human rights commission (NHRC) chuan state pahnihten ramri chungchanga buaina an neihin a nghawng zel niin a sawi thung.