Meghalaya-ah TMC hotu Mamata Banerjee a zin

West Bengal chief minister leh All India Trinamool Congress (AITC) chairperson Mamata Banerjee chuan ni hnih cham turin Thawhṭanni khan Meghalaya-ah a zin a, Umroi Airport-ah an party mi leh sa ṭhahnem takin an lo hmuak.

Mamata Banerjee hian Meghalaya state a tlawh ṭum khatna niin, AITC national secretary Abhishek Banerjee-a'n a ṭawiawm.

Nimin khan Shillong-a State Central Library-a U Soso Tham Auditorium-ah West Bengal CM hian Party Workers' Convention hmanpuiin, he hunah hian an party hnuaia district leh block committee hruaitu; women, youth leh student front member-te bakah, party worker-te an tel a ni. AITC chairperson hian tlai lamah Windermer Resort, Umpling-a pre-Chirstmas celebration pawh a hmanpui bawk.

Meghalaya-a Congress MLA 17 zinga 12-ten nikum November thla khan TMC hi an zawm a, hei vang hian Meghalaya assembly-ah pawh eptu party lian ber an ni zui nghal a ni. TMC zawmtu zingah hian chief minister hlui Mukul Sangma pawh a tel.

West Bengal-a rorellai, TMC hian hmarchhak state - Tripura, Assam leh Meghalaya-ahte huang zuah tumin ṭan an la chho mek a, TMC national secretary Abishek Banerjee pawhin Meghalaya hi a vawi khat kalna a ni. Nakkuma assembly inthlan lo awm turah pawh party mala chuh an tum a, Mukul Sangma chu chief ministerial candidate-ah an dah dawn a ni.