Assam sorkar kutah Bru hel 1,179 inpe

Assam police-te chuan Thawhṭanni khan Bru helpawl pahnih aṭangin hel 1,179 chu sorkar kutah an inpe tih an sawi.

Additional director general of police (special branch) Hiren Chandra Nath chuan Hailakandi district-a hel inpete hi Bru helpawl pahnih - United Democratic Liberation Front of Barak Valley (UDLF-BV) leh Bru Revolutionary Army of Union (BRAU) amite an ni tih a sawi. Helte hian an ralthuam kawl, AK series rifle 18, M26 rifle leh cartridge 400 chuang an pe lut nghal bawk. Heng helpawl pahnihte hi Assam-Mizoram border-ah an chetla ber ṭhin.

Hiren Chandra Nath chuan, "Kum 2017 aṭang khan helpawl pahnihte remna siampui tum hian hma lak chhoh a ni. Harsatna hrang hrang a awm chungin, chief minister Himanta Biswa Sarma kaihhruaina hnuaiah inbiakna pawh kan neihpui thei ta a ni," a ti. Hel inpete hi chhawmdawl zuina tur pawh pek thuai an ni dawn a, helpawl dang an awm thar lohna tur pawhin theihtawp an chhuah dawn tih a sawi bawk.