Nagaland-a hri kai hmuh thar zingah MLA pakhat leh Assembly staff 6 an tel

Nagaland-ah Nilaini khan Covid-19 kai hmuh chhuah mi 53 awm belh lehin, an zingah hian  MLA Mhathung Yanthan bakah Assembly staff paruk an tel tih health minister S Pangnyu Phom chuan a sawi. 

Hri kai hmuh thar zinga 29 chu Dimapur district mi niin, Kohima-ah mi 19 an awm bawk. Nagaland-a hri kai hmuh chhuah tawh hi mi 1,513 an tling tawh a ni. MLA Yanthan chuan Covid-19 a kai thu hi a twitter-ah tarlangin, a taksa lamah harsatna a nei lo tih a sawi nghal bawk. Yanthan hi in lamah a inkhung hrang nghal a ni. 

Assembly session a awm dawn avangin MLA leh Assembly secretariat staff te bakah, assembly-a tel turte  chu danin a phut angin Covid-19 test neih sak vek an ni. MLA dang, R Khing chuan a test result chu negative mah se, a staff pahnihten hri hi an kai tih hriat a nih avangin amah pawh a inkhung hrang a, in lam aṭangin hna a thawk tih a sawi bawk.

Nagaland-ah hian hri kai zinga 595 chu enkawl dam an ni tawh a, mahse hri kai  hmuh chhuah belh zel an nih avangin an recovery rate pawh 39.32% ah a tlahniam tawh. Hri kai zinga panga in an thihpui tawh bawk a ni. Hri kai hmuh tawh zinga 576 chu Dimapur district mi niin, Kohima-ah 427, Peren-ah 252, Mon-ah 148 hmuh an ni tawh a, Kiphire chu  hri kai la hmuh lohna district awmchhun a ni.