Assam-in hmun dang aṭanga hawte inkhung hran hun titawi

Assam sorkar chuan Covid-19 leng vanga state pawn lam aṭanga hawte ni 14 chhung inkhung hrang phawt tura a tih chu ni 10-ah ah a tihtawi. Hei hian institution/hotel leh ina inkhung hrangte pawh a huam vek ang. 

July 24 khan state sorkar chuan Covid-19 kai enkawl dam tawh, enkawlna hmun aṭanga chhuak tawhte in lamah ni 14 chhung inkhung hrang leh tura a tih pawh ni 7-ah a lo titlem tawh bawk a ni. State sorkar chuan February 7 aṭanga Rapid Antigen leh RT-PCR test hmanga sample a endik chu Nilaini  khan nuai riat a tling tawh tih a sawi. State chhungah hian sample test-na tur laboratory 17 a awm tawh bawk a ni. 

Nilaini khan  Covid-19 kai pali an thih belh leh a, anni nen hian Assam-a hripui vanga thi hi mi 92 an tling tawh a ni. Hri kai hmuh chhuah tawh hi mi 34,947 awm tawhin, an zinga 26,618 chu enkawl dam an ni tawh. Hri kai zinga dinhmun ṭha lo zualte enkawlna tura hri kai dam tawhten thisen var an thawhna tur, plasma bank chu state sorkar chuan Gauhati Medical College & Hospital-ah a din tawh bawk.