MHA-in 'Frontier Nagaland' state phût chungchang zirchiang dawn

Eastern Nagaland People's Organisation (ENPO)-in Nagaland khawchhak lam biala state hran, 'Frontier Nagaland' din an phut chungchang chu Ministry of Home Affairs (MHA)-in a zirchiang dawn.

MHA hian ENPO thil phut zirchiang tur hian member pathum awmna committee a din a, committee hian December 16-ah Nagaland hi an tlawh dawn a ni. Committee hi MHA-a advisor (Northeast) AK Mishra-a'n a ho a, member-ah hian Intellingence Bureau-a joint director Dr Mandeep Singh leh MHA Northeast division-a director AK Dhayani-te ruat an ni.

Nagaland khawchhak lam, Frontier Nagaland state din an phutna hian district paruk - Mon, Tuensang, Kiphire, Longleng, Noklak leh Shamator-te a huam a, heng bialah hian hnam pasarih - Chang, Khiamniungan, Konyak, Phome, Sangtam, Tikhir leh Yimkhiung-te an cheng.

Kum 2010 aṭang khan state hrang din phutna hi an kalpui ṭan tawh a, kumin December 6 khan ENPO palaite chuan New Delhi-ah union home minister Amit Shah hmuin an sawipui tawh bawk. An thil phut hi sorkarin a ngaihtuah sak loh chuan, nakkuma state assembly inthlan a neih tur pawh boycott-ah an vau.

MHA team hian Nagaland-a an cham chhung hian ENPO leh an talk team, sorkar laipuia memorandum an thehluhah hming ziaktute, state sorkar official, tribal pawl sarih aiawhte, Eastern Nagaland Women's Organisation, Eastern Nagaland Students' Federation, village chief leh senior citizen-te meeting neihpui an tum.

ENPO hian central team-in an tlawh tuk, December 19-ah central executive committee meeting a ko nghal bawk a ni. ENPO hian khawchhak lam bialte hi sorkarin a ngaihthah ṭhin avangin hma an sawn thei lo a, bial leh district hnufual an ni reng bik niin an sawi. Hei vang hian hma an sawn ve theih nan state hran din hi an phut a ni.