Sikkim BJP president DB Chauhan a bang

Sikkim state BJP president DB Chauhan chuan central lama an hruaituten an state unit chu an ngai pawimawh tawk lo nia sawiin, Thawhlehni khan party hruaitu a nihna aṭangin a bang.

DB Chauhan chuan Sikkim-a rorellai, Sikkim Krantikari Morcha (SKM)-in BJP nena thawhdun an duh thu sawiin, chief minister Prem Singh Tamang kaihhruaia tel ve an duh chungchanga chu central lama party hruaitute an hrilh a, mahse state unit duh dan ang chu an ngaih pawimawhsak lo niin a sawi.

"BJP national president JP Nadda hnenah pawh BJP MLA 12-ten Sikkim sorkara tel ve an duh thu hi hmaichhanah ngei ka hrilh a, mahse kan ngenna hi min bawhzuipui loin, Sikkim CM pawh engmah a sawipui duh lo, " tiin Chauhan central lama hruaituten an state unit harsatna thlen thei thilte an ngaituahzui sak duh loh vangin party president a nihna aṭangin a bang tih a sawi. Union home minister Amit Shah-a'n an state a tlawh ṭum pawhin, party hruaitute hmu turin minute nga pawh hun a nei thei lo a ni, a ti.

Kum 2019 khan Sikkim Democratic Front (SDF) MLA 10 chu BJP-an inletin, by-election ah seat hnih an la leh bawk a, tunah BJP hian MLA 12 an nei mek a ni.