Tripura-in August 4 thleng total lockdown pawtsei

Tripura sorkar chuan hripui leng vanga state puma total lockdown a puan chu, hri kai an pun belh zel avangin ni nga dang pawtseiin, August 5 thleng a kalpui chhunzawm dawn. 

Chief minister Biplab Kumar Deb chuan Nilaini zan khan state mipuite tana thuchah tichhuakin, an boruak tawn mekah social distancing dan hman ṭhat a, pawn chhuahna mask vuah leh fimkhur taka awm chu hri laka an him theihna tur a ni tih a sawi. Deb chuan hri darh zel tur venna atana ni thum total lockdown puan chu  a tawk lo a, inkharkhipna hi kalpui chhunzawm a nih loh chuan an hma lak tawhna hi awmze nei lo a ni mai dawn tih a sawi. 

Lockdown kalpui vang chuan mipui pawn chhuak leh veivak an tlem a, hei hian hri darh tur chu kawng tam takin thunun theih a ni dawn a ni, a ti. An state-ah Covid-19 vanga thi chu mi 21 an awm tawh tih CM chuan a sawi a, a tam zawk hi kum 60 chung lam an ni tih a sawi bawk. 

Tripura chu India ram state zingah mipuite hriselna dinhmun enfiah a, door-to-door survey nei awmchhun a nih thu CM chuan a sawi. "Chhungkaw nuai kua chuangte an hriselna dinhmunte enfiah a nih hunah, kan state dinhmun hi kan hrechiang thei dawn a ni. Survey  neihna atan hian ni sarih aṭanga ni riat vel a ngai dawn a, hei vang hian lockdown pawhsei hi thil ṭul a ni," a ti. Survey neih aṭanga ni hnih chhungin chhungkaw 3,88,782 te tlawhin an dinhmunte zawh a ni a, sample 5,687 lak niin an zinga 196 chu an positive tih hriat a ni, tiin CM chuan a sawi. Survey hi thawktu 12,000 velin an nei mek a, sorkar chuan antigen testing kit hmanga sample test-na turin testing centre 711 a siam tawh a ni, a ti.