Manipur-ah hri kai tam ber ni thleng

Manipur-ah Nilaini khan hri kai hmuh chhuah tam ber ni a thleng a, mi 141 in Covid-19 an kai tih hmuh chhuah a ni. 

Hri kai hmuh tharte hi mipa 117 leh hmeichhia 24 an ni a, anni nen hian Manipur-a hri kai hmuh chhuah tawh hi mi 2,458 an awm tawh. Hri kai zinga 1,653 chu enkawl dam an ni tawh a, enkawl mek 805 an la awm. Mi pakhatin a thihpui tawh bawk a ni. 

Hri vanga thi ruang hi a chhungten an lak loh avangin state sorkar chuan Imphal Municipal Corporation thlanmualah an halral a ni. Nilaini vek khan hri kai enkawl dam mi 38 an awm a, recovery rate hi 67.24% a ni.