Meghalaya sorkarin FIRST Cancer Care project atan MoU ziahpui

Meghalaya sorkar chuan an state-a cancer veite rang zawka hriatchhuah a, enkawl thuai an nih theihna tura hma laknaah, healthcare firm Appollo Telehealth Networking Foundation chu thawhpui turin inremna, memorandum of understanding (MoU) a ziahpui.

ICMR-NCDIR in 2021 report a tihchhuahah, Meghalaya hi India ramah mipa cancer vei tamna state pahnihna leh, hmeichhia cancer vei tam lamah 11-na a ni.

Nilainia Shillong-a MoU ziahnaah hian chief minister Conrad K Sangma leh, Apollo Telehealth Foundation leh World Economic Forum official-ten an telpui a ni.

CM Sangma chuan an state-ah cancer vei an tam a, he natna veite rang taka hmuhchhuah a, enkawlna pek thuai an nih theihna turin sorkar chuan ruahmanna siamin, India ramah helam kawnga a hmasa ber turin Fourth Industrial Revolution for Sustainable Transformation (FIRST) Cancer Care project hi a siam tih a sawi. He project kaltlang hian mipuite hnenah cancer natna hrang hrang chungchangah zirtirna pawh pek niin, mass screening-te neih a ni dawn tih a sawi.

FIRST Cancer Care project hnuaiah hian screening leh treatment hi Civil Hospital Shillong-a special clinic siamah neih ṭhin a ni ang.

National Health Mission of Meghalaya chuan First Cancer Care Pilot Project kalpui dan tur hi stakeholder hrang hrangte sawipui a nih thu sawiin, ASHA worker aṭanga senior health staff thlengin skill training pek an ni dawn a ni, a ti.