Tripura TMC-in Human Rights Commission-ah memorandum thehlut

Tripura Pradesh Trinamool Congress (TMC) chuan Agartala khawpuia Selection Test for Graduate Teachers (STGT)-a tlingte nawrh huaihawtte chunga police-ten kut an thlak chungchangah, Tripura Human Rights Commission (THRC)-ah memoradum an thehlut.

Nilainnia THRC-a memoran-dum thehluhnaah hian AITC leader leh Rajya Sabha MP Sushmita Dev, party state president leh senior advocate Pijush Kanti Biswas bakah party official dangte an tel.

State TMC president Biswas chuan Agartala-a nawrh huaihawtte chunga police-te chet dan chu human rights palzutna lian tak a ni tiin, THRC chu inrawlh turin a ngen. Biswas chuan, "Sorkarin ṭhalai hna neilote tana hna siamsak a intiamna chu a tipuitling thei lo a, an zingah hian STCT exam-a tlingte hna a pe thei lo. He exam-a tlingte hi thla ruk chhunga hna lakna tur tihfel a ngai a, tunah hian an exam aṭangin thla li a tling tawh a, thla hnih chauh awm tawhin a lak fel hman loh chuan an exam hian awmzia a nei tawh dawn lo a ni. Hei vang hian an dikna chanvo neih anga hna pe tura sorkar phutna an lantir chu police-te chuan tiang nen kut an lo thlak a ni," a ti. Police-te kut thlakna avang hian mi 40 chu enkawl ngaiin an awm a, an zinga pali chu an na hle niin a sawi bawk.

Tripura police-te chet dan chu a dem thu sawiin, boruak ṭha tak hnuaia nawrh huaihawtte chunga kut an thlak chu eng kawng mahin pawm theih a ni lo, a ti. A hma pawhin police-te hian an hna ngaia dah leh phuta zirtirtu nawrh huaihawtte pawh water cannon leh thil dangte an lo hmang tawh bawk tih a sawi.