NEZCC-in hmarchhak state 8 aṭanga award dawng tur artist 24 thlang

North East Zone Cultural Centre (NEZCC) chuan kum 2021-22 chhung atana hmarchhak state pariat aṭangin Young Talented Artistes Award dawng tur mi 24 a thlang chhuak.

Thuchhuah siamin, NEZCC Director Prashanna Gogoi chuan Young Talented Artistes Award Selection Committee chu November 30 khan chawimawina dawng turte thlang chhuak tur hian a ṭhukhawm tih a sawi.

Young Talented Artistes Award scheme hi kum 2003-2004 aṭang khan sorkar laipuia ministry of culture chuan ṭhalai kum 18-30 inkar, fold art lama talent nei ṭhate chawimawi leh chawhphurna atan a buatsaih a ni. Print leh social media kaltlangin application thehluh tura sawmna a tichhuak ṭhin. Application thehlutte leh, state sorkar hnuaia department of art& culture-in hming an pek luhte chu Selection Committee-a expert panel-in a lo thlang chhuak ṭhin a ni. Award hian pawisa fai, Rs 20,000 leh certificate a keng tel a, special award ceremony-ah chawimawina hi sem chhuah a ni ṭhin.

Kuminah NEZCC hian state pariat aṭangin application hi 73 a dawng a, uluk taka an zirchian hnuah committee chuan artist 24, mipa 12 leh hmeichhia 12 chu 2021-22 award dawng tur hian a thlang chhuak ta a ni.