Tripura : BJP-in inthlan lo awm turah IPFT thawhpui zel tum

Tripura-a rorellai, BJP chuan nakkuma state assembly inthlan neih turah Indigenous People’s Front of Tripura (IPFT) chu thawhpui chhunzawm zel an tum tih an sawi.

BJP leh IPFT hi kum 2018 assembly inthlan dawnah khan thawk dunin, Left Front an hneh a ni. BJP-IPFT thawkdun hian assembly seat 60-ah seat 43 lain, BJP hian seat 35 leh IPFT-in seat 8 an la a ni.

State BJP president Rajib Bhattacharjee chuan, "BJP chuan a thawhpui party-te a zah a, awmze nei loin thawhdunna tihtawp a ngai lo. Prime minister hlui Atal Bihari Vajpayee khan National Democratic Alliance (NDA) sorkar a din a, tun thlengin NDA hi a la ding reng a ni," tiin a sawi.

Kum 2023 assembly inthlan neih tura hma lak dan tur chu central lama BJP hruaitute nen pawh an sawiho tawh tih Bhattacharjee chuan a sawi bawk. Tripura regional party dang, autonomous district council-a thuneihna chang mek, Tipra Motha nen inbiakna an neih loh thu a tarlang.