PM Modi-a'n Meghalaya leh Tripura a tlawh

Prime minister Narendra Modi chuan nimin khan assembly inthlan hmabak, Meghalaya leh Tripura a tlawh a, project hrang hrang cheng vaibelchhe 6,800 chuang hu lungphum a phum.

Prime Minster in state pahniha project lungphum a phumte hi sector hrang hrang - housing, road, agriculture, telecom, IT, tourism leh hospitality amite an ni.

Modi hian nimin zing khan Shillong thlengin, North Eastern Council golden jubilee lawmna a hmanpui a ni. Union home minister Amit Shah leh midang dang ṭhenkhatin an zui. PM hian NEC-in kum 50 liam ta chhunga hmarchhak bial hmasawnna tura hnathawhte tarlanna, 'Golden Footprints' tih chu a tlangzarh nghal bawk. Kum 50 chhunga NEC hmalakna hrang hrang, short film-a siam pawh jubilee lawmnaah hian tihchhuah a ni. Jubilee lawmnaah hian PM bakah Amit Shah leh DoNER minister G Kishan Reddy-ten thu an sawi.

NEG golden jubilee lawmna hun hman zawhah Prime Minister hian Umsawli-a IIM Shillong campus thar a hawng a, Mushroom Development Centre -a laboratory leh beekeeping development centre a hawng tel bawk. Meghalaya-ah hian Rs vbc 2,450 man project lungpum a phum a, heng zingah hian road project pali a tel.

PM hian chawhnu lamah Shillong aṭangin Tripura khawpui, Agartala a pan a, Pradhan Mantri Awas Yojana Urban leh Rural scheme hnuaia 'Grih Pravesh' programme a hawng. Tripura ah hian Rs vbc 4,350 hu project lungphum a phum. Anandnagar-a State Institute of Hotel Management leh Agartala Government Dental College a hawng bawk.

Meghalaya leh Tripura hi nakkum kum tir lama assembly inthlan nei tur an ni. Tripura-ah hian BJP chuan sorkarna a siam mek a, Meghalaya-ah pawh thuneihna chan tumin tan an la chho hle a ni.