Rijiju-a'n India-China border a sipaite intihbuaina hmun a tlawh

Union law minister leh Arunachal Pradesh MP Kiren Rijiju chuan tun hnaia India leh China sipaite intihbuaina, line of actual control (LAC)-a Tawang sector-a Yangtse area chu Inrinni khan a tlawh.

Kiren Rijiju chuan India-China border-a India sipai duty-te thla a lakpui chu a twitter ah dahin, ramria duty tura sipaite dah belh an nih hnuah Arunachal Pradesh dinhmun chu a him tawk hle tih a sawi nghal bawk.

Rijiju hian Congress party hruaitu, Rahul Gandhi-a'n China chu indo tura a inbuatsaih mek laiin India erawh chuan thil tha lo thleng thei turte a ngaihthah nia a sawi chhanna atan a thlalak hi a dah chhuak a ni.

Hetih lai hian Congress party hruaitu Jairam Ramesh chuan Rijiju-a thlalak dah chu thlalak hlui, kum thum liamta ami kha a nih thu leh, tun hnaia a lak anga a tarlang chu thil zahthlak tak a nih thu a rawn sawi lang nghal.