Assam Hills Council staff-te voluntary pension dan tur ngaihtuah

North Cachar Hills Autono­mous Council (NCHAC) chuan an Council hnuaia hnathawk 2,300 te hlawh chu kum khat zet an pe thei tawh lo a, hemi a nih avang hian an staff zinga mi 1000 chu voluntary retirement pek mai an duh tih official thuchhuah chuan an tarlang. Assam sorkar hnenah an harsatna te sutkian nan hian cheng vaibelchhe 200 an dil bawk a ni.

Dima Hasao District-a department zawng zawng deuh thaw enkawltu NCHAC hian general administration, police, treasury, election leh judiciary tih lohah chuan executive power an nei vek a, an hnathawk te hnenah hian kum kalta 2016 aṭang khan hlawh an pe tawh lo niin official-te chuan an sawi.

NC Hills Autonomous Council Employees’ Union(NCHACEU) leh activist-te chuan eirukna pawisa hmanna tur ni loa hman a nih thu an sawi a, hetih lai hian Council chuan sorkar hmasa chu demin an mamawh bak aia tam hnathawktu laah an puh thung. Council hian an hnathawk te Voluntary Retirement Scheme (VRS) pekna tur ruahmanna Assam sorkar hnenah a thlen a ni.

NCHAC Chief Executive Member (CEM) Debolal Garlosa chuan thla 15 kaltaa thuneihna an chan khan hnathawktu te hlawh hi thla 9 a pending tawh thu a sawi a, sorkar hmasa chu mamawh bak aia tam hnathawktu laah puhin an chhung leh khat, laina hnaite hna an pek nasat avanaga hetiang harsatnaa thleng ta hi an nih thu a sawi.

Council-ah hian hnathawk mi 2,270 an awm thu sawiin heng ho hian nikum November thla aṭang khan hlawh an la tawh lo tih sawiin, Debolal Garlosa chuan hnathawkte thla tin hlawh atan hian cheng vaibelchhe 6.3 an mamawh laiin chhiah aṭangin cheng vaibelchhe 2 chiah an hmuh thu a sawi. Thuneihna an chan tirh khan DA 65% a nih laiin tunah chuan 109% a nih tawh thu a sawi a, hetiang dinhmunah hi chuan eng CEM tan mah hma lak vak ngaihna a awm lo a ni, a ti.

CEM chuan hmalak dan awlsam ber chu hnathawktu tihtlem a nih thu sawiin, thla tin pawisa chhuak tur zat tihtlem chuan kawngro a su ber dawn niin a sawi a ni.

Garlosa chuan mi 1,200 chauh pawh hnathawktu awm mah se hna ṭha taka kalpui a nih theih tho thu sawiin midang 1,000 chu voluntary retirement pek mai ṭha an tih thu a sawi a, state sorkar hnenah pawh hemi atana ruahmanna an siam cheng vaibelchhe 200 chu an thlen tawh thu a sawi bawk.