Kum 2 chhungin Naga hel 1,000 vel man

Naga helpawl, Nationalist Socialist Council of Nagaland - Khaplang (NSCN-K) ten kum hnih kaltaa Manipur-a Army convoy beia sipai 18 lai an thah hnu khan Naga hel mi 1,000 aia tam security force ten an man tawh thu official thuchhuah chuan a tarlang.

NSCN-K mi leh sa under­ground-a che ṭhin mi 531 leh underground anga awm lem lo mi 542 chu Manipur leh Nagaland-ah man an nih tawh thu sawiin, official-te chuan heng mite hi June 4, 2015-a hel ten sipai-te an beih vak hnua chhanletna operation-a an man vek an nih thu an sawi.

Home Ministry official thu­puangtu chuan operation hi tunah pawh kalpui mek zel a la nih thu a sawi a, security force te pawhin NSCN-K te hmalakna tur tam tak an dodal niin a sawi bawk.

Kum hnih kalta chhungin security force-te hian NSCN-K mi 34 an that tawh a, underground leh underground anga awm lem lo te aṭangin ralthuam 571 vel an man tawh bawk a ni.

Official te chuan June 2015-a sipai ten beih an tawh hnu khan NSCN-K camp-ah surgical strike nei nghalin mi eng emaw zat an that a, an camp pawh an tihchhiatsak an ni tih an sawi. Security force te hian NSCN-IM mi 37 an man tawh bawk a, NSCN-KN mi 26 leh NSCN-R mi pali an man tawh thu an sawi bawk.

NSCN-K hian March 27, 2015-a ceasefire agreement an bawhchhiat hnu khan Naga hel pawl dang pathum te hi chuan ceasefire agreement hi an la zawm ṭha hle nia tarlan a ni.

December 8 khan Union Home Minister Rajnath Singh chuan hmarchhak biala hel pawl hrang hrang te tharum thawhna chu a tlem tial tial a, 80% aṭangin 75%-ah a tlahniam niin a sawi a ni. Naga mipui ten hma lam hun eng tak an neih theih nan sorkar laipui chuan a theihtawp a chhuah tur thu a lo sawi tawh bawk.

Nagaland mipuite chuan muanna a awm chhoh zel beiseina sang an nei a, sorkar laipui leh NSCN-IM ten 2015-a Framework Agreement an ziah hnu phei kha chuan an beiseina hi a sang leh zual hle a ni.

Tun thla tira Hornbill Festi­val hawnnaa thu a sawinaah President Ram Nath Kovind pawhin Naga political issue chu a hmawr bawk ṭep a nih tawh thu a lo sawi ve bawk a, September 19 khan Nagaland Governor PB Acharya chuan Naga issue chu thla rei lote hnuah chinfel a ni tawh dawn niin a lo sawi tawh bawk a ni.