APPSC-in Combine Prelims exam conduct ṭha dawn

Arunachal Pradesh Public Service Commission (APPSC) chuan thuchhuah siamin, thla kaltaa combine preliminary exam an conduct chungchangah buaina leh inhnialna a tam avangin exam an conduct ṭha leh dawn niin a tarlang.

November thlaa exam an conduct khan sawisel a hlawh hle a, question paper chungchanagh inhnial buaina a tamin Pakistan Civil Service exam question hlui an entawn nia sawi a awm bawk a ni.

APPSC chuan exam buat­saih ṭhat a nih tur thu sawi mah se, exam hun tur tak erawh a la tarlang tel lo.

Prelims exam beitute hi an lungawi lo hle a, Commission office kawtah te pungkhawmin exam neih ṭhat leh an beisei thu an tlangaupui nasa hle a, hei vang hian APPSC hian exam hi an conduct ṭha leh dawn ta a ni. Candidiate te chuan Con­tro­ller of Examninations te chunga action lak an ngiat bawk a, High Court Judge retired emaw Session Judge kaihhruaina hnuaia enquiry committee din an ngiat bawk tih official te chuan an sawi.

Hetihlai hian Peoples' Party of Arunachal (PPA) pawhin Thawhṭanni khan Commission chairman hnenah memorandum thehlutin, Union Public Service Commission pattern hmanga state civil service exam conduct turin an lo ngen ve bawk. Party official-te chuan APPSC exam conduct dan chu a tunlai tawh lo tih sawiin, preliminary exam-ah candidate te chuan optional subject hran ṭheuh an la neih thu an sawi. PPA chuan hetiang style hi hmang tawh lo turin APPSC chu an ngen a, UPSC exam conduct dan pattern, candidate academic back­ground hrang hrang nei ten aptitude test leh general studies paper inang an chhan ṭhin ang chu kalpui ve turin an ti a ni. PPA chuan hetianga kalphung thlak danglam hian APPSC hmel lan dan a tidanglam dawn niin an sawi. Party official-te chuan exam question paper buatsaihtute chunga action a rang thei ang bera lak an phut thu an sawi bawk.