MHA team-in Nagaland CM Rio an hmu

Eastern Nagaland Peoples' Organisation (ENPO)-in Nagaland khawchhak lam biala state hran, Frontier Nagaland din an phut chungchang a hmuna kala zirchiangtu, ministry of home affairs (MHA) team chuan nimin khan Nagaland chief minister Neiphiu Rio an kawm.

MHA advisor (North East) AK Mishra kaihhruai member pathum awmna, MHA team hian Pathianni khan Kohima hi an thleng a ni. Frontier Nagaland thil phut chungchang sawipuiin CM Rio an kawm a, MLA leh senior official-te an hmu bawk.

Central team hian nimin vek khan Tuensang-ah pawl hrang hrang meeting an neihpui bawk. Noklak district-a Pangsha khua tlawhin, tualchhung mite nen an inkawm bawk a ni. Vawiinah Delhi lamah an kir dawn a, sorkar laipuiah report an thehlut ang. An report-te zirchian a nih hnuah, nakkum January thla hian union home minister Amit Shah chuan Eastern Nagaland hi a tlawh ve leh dawn a ni.

ENP chuan nimin khan central team-in an tlawh chungchang sawihoin nimin khan CKS Hall, Tuensang-ah central executive council meeting an nei ve nghal.