Assam : Nagaon-ah eviction drive kalpui

Assam sorkar chuan nimin aṭang khan Nagaon district-a sorkar rama chengte chhuahtir hna, eviction drive chu venhimna khauh tak hnuaiah a kalpui ṭan ta.

Eviction drive hi Santijan bazaar area-ah ṭan niin, buaina a chhuah palh venthawn thilah security force mi 600 chuang duty tir an ni. Nagaon SP Leena Doley chuan harsatna leh buaina lian tham chhuak a awm lo tih a sawi. Eviction drive hi khaw paliah neih a nih tur thu a sawi bawk.

Nagaon district-a Dhing revenue circle hnuaiah sorkar ram, biga 1,200 chuanga zau chu mimal in an luah a ni. Heng hmuna chengte chhuah tir vek tur hian ni eng emaw zat hun a ngai dawn niin SP chuan a sawi. A hmain an awmna hmun chhuahsan tura hriattirna pawh pek vek a nih thu leh, dawr leh in bakah structure eng emaw zat chu an lo ṭhiah tawh thu a sawi.

Assam sorkar hian nikum September thla khan Darrang district-a Dhalpur area-ah eviction drive hi a lo kalpui tawh bawk a, hemi ṭum hian buaina chhuakin mi pahnih an thih bakah, mi dang 20 chuangin hliam an tuar a ni.