Meghalaya Congress MLA Ampareen Lyndoh-i'n NPP zawm

Meghalaya-a Congress MLA, minister hlui ni bawk Ampareen Lyngdoh chuan Congress party chhuahsanin, nimin khan rorellai National People's Party (NPP) a zawm.

MLA Amapareen Lyngdoh hi NPP kaihhruai Meghalaya Democratic Alliance (MDA) sorkar a thlawp avangin Congress party chuan a lo suspend tawh a ni.

Congress party president Mallikarjun Kharge hnenah email hmangin Congress party a bansan thu hi a hrilh tawh a, nimin chawhma dar 11 khan Meghalaya Legislative Assembly speaker Metbah Lyngdoh hnenah banna thehlutin, tlai dar 3 khan NPP-ah lakluh a ni zui nghal.

Ampareen Lyngdoh bakah Congress party-in an suspend mek, Congress MLA Mohendro Rapsang pawhin NPP hi a zawm dawn nia sawi a ni bawk. Congress party hian an party MLA pangate chu MDA sorkar an thlawp avangin an suspend mek a ni.

Meghalaya state hi nakkum kumtir lamah assembly inthlang tur an ni a, party hrang hrang dinhmun pawh a in siksawi nasa chho hle. November thla khan rorellai, NPP MLA pahnih leh Trinamool Congress (TMC) MLA pakhat chuan BJP an lo zawm tawh bawk.